I concursc leterars por ladin “Scribo” y “Scribo Junior” vëgn derevers
Do deplü agn dal’ultima ediziun, vëgnel en chësc ann indô a s’al dé le concurs leterar “Scribo”.
En gaujiun di 50 agn dala fondaziun, mët l’Istitut Ladin Micurá de Rü a jí, en colauraziun cun la Direziun Intendënza y Cultura ladina, i concursc “Scribo” y “Scribo Junior”.
L’iniziativa é dedicada ala promoziun dl lingaz y dla leteratöra ladina y inviëia auturies y auturs da scrí stories cörtes o cunties originales nia ciamó publicades te öna dles variantes ladines dles Dolomites.
Al ne ti vëgn metü dant degügn limic ala creativité por ci che reverda i contignüs.
Le concurs “Scribo” é por partezipantes y partezipanc dai 25 agn insö, deperpo che “Scribo Junior” é resservé por auturies y auturs jogn sot i 25 agn.
Vignun pó ma mené ite un n test su, che ne pó nia avëi plü co 8.000 batüdes. L’ultimo termo da dé jö i tesć toma ai 30 de jügn 2026 dales 12:00.
Por trames les categories él odü dant pesć interessanc: le pröm pest é de 3.000 euro (netto) y le secundo de 2.000 euro (netto).
La valutaziun di laurs dá jö gnará fata da na iuria de esperc aladô dla cualité di contignüs, dla strotöra linguistica y dl’elaboraziun leterara y stilistica.
La iuria é metüda adöm da: Nadia Chiocchetti, Werner Pescosta, Ingrid Runggaldier, Ivan Senoner, Carlo Suani.
Chëstes les parores dl’assessur provinzial por la Formaziun y Cultura ladina, Daniel Alfreider: “I sun contënt che al vëgnes indô metü a jí le concurs leterar “Scribo” y i ti sporji mi rengraziamënt ai organisadus y ales organisadësses. I sá che al é impó na buna cumpëda de porsones che se dá jö cun la scritöra por ladin, y al é dërt ti pité ocajiuns de visibilité y aprijamënt. Tres chësc concurs á sëgn le panorama leterar ladin na bela poscibilité da desmostré ciamó n iade süa vitalité y süa cualité.”
“Tröc aspetâ bele ert sön na ediziun nöia dl concurs leterar ‘Scribo’ – porchël sunsi ciamó plü contënt che al vëgnes realisé en chësc iade deboriada cun l’Istitut Ladin. L’iniziativa dess ester valch por auturies y auturs de deplü generaziuns y tl medemo tëmp ince ester n stimul por zacai da se dé jö cun la scritöra”, spliga le diretur dl’Intendënza y Cultura ladina André Comploi.
La direturia dl Istitut Ladin Micurá de Rü, Irene Prinoth, sotrissëia: “Cun l’ediziun nöia de ‘Scribo’ y ‘Scribo Junior’ dunse n segnal sterch de n svilup ví dl lingaz ladin y i cheriun tl medemo tëmp na lerch por usc leterares nöies.”
FORMULAR POR L'ISCRIZIUN A SCRIBO
FORMULAR POR L'ISCRIZIUN A SCRIBO JUNIOR
