|
Durnwalder y Mussner é rovà tl Istitut Micurà de Rü. Ai é gnüs tuć ite dal Presidënt Dr. Albert Videsott, dal Vizepresidënt Dr. Bruno Senoner y dal Diretur Dr. Leander Moroder.
Tratan l’incuntada él gnü presentè i ćiamps d’ativité prinzipai dl Istitut. Pröm de düć é chël dl lingaz ladin, olache l’Istitut, zënter de competënza por le lingaz ladin sön inćiaria dla Provinzia, é responsabl por la normaziun y le svilup.
Te Istitut vëgnel laorè fora dizionars dal todësch y dal talian tl ladin (y tla verjiun ôta), gramatiches y cursc de lingaz, sides sön papier che por l’internet.
Laprò vëgnel l’ativitê de publicaziun che fej fora na pert importanta dl laûr. Te 35 agn d’ativité à l’Istitut dè fora 258 operes, te ćiamps desvalis (p.ej. linguistica, lessicografia, antropologia, etnomusicologia, storia, religiun, libri por mituns, usanzes y tradiziuns).
N ater ćiamp de ativité é la toponomastica, olache l’Istitut à coiü adöm danter Gherdëna y Val Badia n gran numer de inoms de posć por ladin che é spo gnüs publicà te chertes toponomastiches.
L’Istitut pîta sambëgn inće n sorvisc de consulënza linguistica. Chësc vëgn a s’al dè tla forma de letorać, elaboraziun de glossars, traduziuns y cursc de lingaz.
Te trames les sëntes, a San Martin y te Sëlva, pon ciafè na bilbioteca spezialisada de romanistica, metüda adöm da operes de leteratöra ladina, tesć de linguistica generala, revistes de politica dles mendranzes y inće publicaziuns sura le Tirol y l’area incëria plü dalunc.
I rapresentanć politics s’à desmostrè contënć dla colaboraziun cun deplü universitês tla Talia y da foradecà, sciöche inće dla colaboraziun cun les istituziuns y les uniuns ladines desvalies. Por ejëmpl él gnü metü a jì da püch na colaboraziun cun la „Lia di Comuns Ladins“, pro chëra che al vëgn laorè fora na plata internet de informaziun sura la Ladinia, daverta a düć.
Do la incuntada à Durnwalder y Mussner dit de ester dër contënć dl’ativité desvalia y complessiva dl Istitut y à assiguré inant so sostëgn ai responsabli de chësta importanta istituziun culturala ladina. |
