|
Cun le passè di agn él gnü arjigné ite a San Martin na biblioteca spezifica de n cer pëis, te chëra che al é da abiné na gran compëda de libri ladins o scric te d’atri lingac che trata dla Ladinia. Al é ince da ciafè libri furlans y grijuns y publicaziuns di vijins todësc, talians y slovens. Implü él na seziun cun libri de linguistica, sides generala che ladina, o che reverda ince d’atres comunitês linguistiches.
Ti salamënc dl Istitut te Sëlva él gnü arjigné ite na picia biblioteca cun i libri de majera importanza sura le lingaz, la storia y la cultura ladina. Le catalogh di libri é gnü reportè sön computer y a chësta manira él deventè scialdi saurì da abiné na publicaziun, ince sce an sà ma na pert dl titul o dl inom de n autur. Ince l‘indesc de na pert di libri é gnü registré sön computer.
Por ci che à da nen fà cun l‘archif, él da dì che al é gnü abiné adöm na certa compëda de documënc originai, en buna pert ince copies de documënc fora di archifs dles calonies.
Le material fotografich, important sides por ci che reverda la cuantité che ince la cualité, é en gran pert gnü abiné adöm y registré sön computer, alisiran insciö dassënn le laûr da chirì na fotografia.
Por podëi chirì y ciafè i libri tla biblioteca dl Istitut Ladin "Micurà de Rü" ince da ciasa demez, él gnü cherié la biblioteca on-line. Insciö po vignun ciafè libri do argomënt, do titul o do autur zënza fà n vare.
|
