Fondaziun

L’Istitut Ladin ”Micurà de Rü” é gnü metü sö tres lege provinziala nr. 27 dl 31.07.1976, publicada tl Boletin Ofizial dla Regiun te trëi lingac. Ai 03.09.1977 à l’Istitut metü man ofizialmënter süa ativité.

L’idea de n istitut ladin por i Ladins dla Provinzia de Balsan é nasciüda tl gremium dl’AGT (Arbeitsgemeinschaft Tirol). Te deplü sentades – oramai dötes tignides a Porsenù – él gnü fat fora le program dl Istitut, y an é spo stà bugn de ciafè le sostëgn dl’autorité politica por la realisaziun de chësta istituziun.

I vari che à portè ala costituziun dl Istitut Ladin

Porsenù, 15.11.1974
Tratan la sentada dl AGT (Arbeitsgemeinschaft Tirol) vëgnel fat fora de ne se cruzié nia ma dla popolaziun todëscia, mo de sostignì ince i Ladins. Les propostes söl co jì inant dess gnì dai Ladins instësc.

Porsenù, 13.12.1974
Te chësta ocajiun él ince dui Ladins laprò: le dr. Heinz Stuflesser de Urtijëi y Pire Castlunger da Lungiarü. Le dr. Heinz Stuflesser recorda les infrastrotöres culturales che i Ladins di Grijuns à, sotlinian dantadöt chëres istituziuns grijunes che se dà da fà por le mantignimënt dl lingaz.

Porsenù, 24.01.1975
Pire Castlunger dij d'avëi ciafè n sostëgn da pert de academics che foss a öna de daidé para, sce al gniss cherié n istitut cultural cun personal a tëmp plëgn por studié y arichì lingaz y cultura.
Düc é a öna cun l'idea de n te' istitut. L'assessur dr. Klaus Dubis mët danfora che l'Istitut Ladin dess gnì aministré dai Ladins y ne dess nia deventè na sort de filiala de n‘atra istituziun, sciöche por ejëmpl dl Südtiroler Kulturinstitut.

Porsenù, 28.02.1975
Tla sentada vëgnel recordè che por ciafè na soluziun ala chestiun finanziara dl Istitut mësson avëi naôta les idees tleres sön la manira sciöche chësta istituziun dess ester strotorada y de ci che an ó arjunje impara. Por chësc fin vëgnel metü sö na comisciun cun chëstes porsones: siur Angel Morlang, le dr. Heinz Stuflesser, le dr. Lois Craffonara y Pire Castlunger. Ara à le compit de elaborè le conzet y le program por n istitut ladin.

Porsenù, 19.04.1975
La comisciun presënta le conzet y le program por l'Istitut y baia ince concretamënter dla chestiun finanziara. An fej fora de se mëte atira en contat cun les Autoritês dla Provinzia por ciafè le finanziamënt de chël che ara va debojëgn.

Porsenù, 07.07.1976
Al vëgn aprovè dala Provinzia la lege y le statut dl Istitut, stampà spo tl Boletin Ofizial dla Regiun ai 31.7.76.

Porsenù, 25.05.1977
Les porsones cherdades dala Provinzia a fà pert dl Consëi d'Istitut nominëia l‘aconsiadù provinzial Franz Demetz de Santa Cristina sciöche presidënt y le dr. Lois Trebo da San Linert sciöche vizepresidënt.

Porsenù, 02.09.1977
Tratan la pröma sentada dl Consëi d‘Istitut vëgnel nominé le dr. Lois Craffonara sciöche diretur dl Istitut.

Ai 03.09.1977 mët l'Istitut man ofizialmënter süa ativité.