Origina dl inom

Micurà de Rü é nasciü ai 4.12.1789 tla vila de Rü a San Ciascian sciöche fi plü jonn de na familia da paur de cater mituns. La scora elementara àl frecuentè te so paîsc nadè y dedô él jü a Porsenù a studié inant tl ginase. Do avëi stlüt jö le lizeum s’à Micurà tignì sö te de plü citês, insciö a Desproch, a Trënt y a Salzburg por portè inant sü stüdi tles facoltês de filosofia y teologia.

Ai 28.08.1814 à Micurà de Rü ciafè a Salzburg la consacraziun da prou. Sü pröms agn de laûr à siur Micurà de Rü passè te deplü cöres tl’Austria sciöche caplan. Plü tert àl spo surantut n post sciöche caplan di soldas y n’inciaria da insigné te n istitut militar por l’educaziun de mituns a Milan. Por n pez é siur Micurà ince stè letur de talian tl’université da Desproch. Do agn de maratia é siur Micurà de Rü mort ai 29.03.1847 a Wilten dlungia Desproch.

Sura sü dovëis da prou fora, nudrî Micurà de Rü ince na gran pasciun por so lingaz dla uma, le ladin.

Dl 1833 àl scrit sciöche pröm na gramatica ladina, intitolada “Versuch einer deütsch-ladinischen Sprachlehre”. Le particolar de chësc laûr é la impostaziun y vijiun dl autur defrunt al ladin, nia caraterisada da na orentè de conservaziun stara, mo de na elaboraziun dl ladin che tëgnes cunt di bojëgns di tëmps. Süa idea é chëra de cherié n lingaz de scritöra unifiché por düc i Ladins dles Dolomites. A onù y recordanza de siur Micurà de Rü porta dal 1976 incà l’Istitut Ladin a San Martin de Tor l’inom de chësta gran personalité ladina.