Raporć cun d’atres mendranzes

Danter i fins dl Istitut Ladin él inće chël de tignì vis i raporc cun la mendranza furlana y cun chëra rumancia di grijuns dla Svizera, dal momënt che ares é por rajuns storiches, de lingaz y de cultura chëres plü vijines a chëra ladina.

Inće le contat y la conescënza de d'atres mendranzes linguistiches é important, sce an pënsa dantadöt ai obietifs valis che vigni mendranza à y che reverda la conservaziun dl patrimone linguistich-cultural particolar che la caraterisëia.

Por chësta rajun él rapresentanć dl grup linguistich ladin che tol pert plütosc gonot a convëgns sura les mendranzes y che va a vijité istituziuns che se crüzia dla conservaziun y dla promoziun de d'atri lingać minoritars.

Gonot él inće rapresentanć de mendranzes da döt le monn che röia adalerch te Istitut, olache le diretur o val ater colaboradù dl Istitut ti spliga plü avisa l'ativité dl Istitut Ladin y plü en general la situaziun atuala di Ladins dles Dolomites.